Ons elkeen is ‘n joernalis!

Posted: 31st January 2016 by Ian Wessels in tuis
Comments Off on Ons elkeen is ‘n joernalis!

Deesdae het almal ‘n selfoon en toegang tot sosiale media. Die oomblik wat jy op iets afkom wat jy voel ander mense moet weet, kan jy dit afneem en saam met jou kommentaar op sosiale media plaas. Dit maak van ons almal fotograwe en joernaliste (of jy nou kan spel of nie!)

Hierdie mag is tot almal se beskikking het opnuut die debat oor vryheid van spraak laat opvlam. Daar is mense wat glo hulle kan sê net wat hulle wil, en daar is mense wat glo “‘n sagte antwoord keer die grimmigheid af.” Ouer mense behoort hierdie wysheid in die Bybel te ken. Tog lyk en klink dit of dit al hoe minder toegepas word.

Dit is inderdaad ‘n kwessie wat verdere oorweging verdien. Wat behoort ‘n mens op sosiale media te deel? Dalk moet jy jouself afvra hoekom jy dit doen. Is dit humoristies en wil jy daarmee ander mense ook ‘n slag laat lag? Is dit inspirerend en wil jy hulle opbeur? Of het dit jou opnuut laat nadink oor iets en jy glo jy dit sal ander ook baat? Soms voel jy iets skokkends moet openbaar gemaak word en soms wil jy bloot uiting gee aan emosies soos teleurstelling of woede. Maar wat hoop jy om daarmee te bereik as jy iet sê soos: “Skiet die bliksems vrek!?” Keer dit die grimmigheid af?

Dikwels deel ons iets impulsief en op die ingewing van die oomblik – sonder om behoorlik na te dink. Gaan kyk maar na die kommentaar wat mense op Vuisboek lewer. Iemand sal bv. (en meestal sonder om al die feite te ken) iets sê oor ‘n pastoor wat in weelde leef. Dan ontstaan daar ‘n element van groepsdruk wat herinner aan bendegeweld. Mense vra dikwels hoekom optogte so maklik handuit ruk. Een persoon gooi ‘n venster uit en skielik kan die res hulle nie meer beheer nie. Soos skape storm hulle agterna en doen dieselfde!

Tog doen ons dikwels dieselfde op sosiale media. In die pastoor se geval sê iemand sy ouma het altyd gesê ‘n mens moet nooit ‘n man vertrou wat met die Bybel onder die arm aan jou deur klop nie, en hier is nou die bewys dat sy reg was. ‘n Volgende het altyd geweet iets is nie pluis met die pastoor nie, sy ogies sit darem te na aan mekaar! En so gaan dit aan. Almal wat sonder sonde is staan tou om die eerste klip te gooi…

Dis ‘n menslike reaksie en ek is self dikwels hieraan skuldig. Toe wys iemand my daarop dat ‘n mens nooit beter voel nadat jy sulke negatiewe opmerkings gemaak het nie, en dat jou opinie niks bewys nie – dit bly net jou opinie. Dus hoef jy nie op alles wat gebeur kommentaar te lewer nie. Neem dit net waar en ‘just let it be.” Jy sal meer vrede in jou gemoed hê. Gebruik hierdie toets as filter: Voor jy oor iemand kommentaar lewer, verbeel jou die persoon sit langs jou saam met ander mense in ‘n gesprek om ‘n tafel. Sal jy steeds in sy gesig voor ander sê wat jy op sosiale media wil sê? Jy mag anoniem voel op sosiale media, maar jy is nie!

Ons kla maklik oor al die slegte nuus en sensasie in die koerante, maar onthou, ons is almal joernaliste. Hoekom help jy dan om dit verder te publiseer? Dan is jy ook deel van die probleem en nie van die oplossing nie. Jy kan moes kies om oor iets anders te skryf. Kom ons vra onsself af wat ons hoop om te bereik met ons “berigte” en wat die effek daarvan gaan wees. Ons tonge is ‘n vuur wat ‘n epidemie van swartgalligheid verder kan aanvuur, of kan help dat mense nuwe hoop kry, te midde van alles wat verkeerd is. So wat wil jy doen? Nog ‘n donker wolk laat opsteek, of liewer die silwer randjie groter maak om die donker wolke wat reeds saamgepak het?

As joernalis is vryheid van spraak jou keuse!

Sê wie?

Posted: 3rd January 2016 by Ian Wessels in tuis
Comments Off on Sê wie?

Dit was baie lekker om die afgelope week weer ‘n bietjie regstreeks uit te saai op RSG. Die haatpos wat ons almal elke dag kry bly vir my verskriklik snaaks omdat dit so baie sê van die klaers en so min van dit waaroor hulle kla. Dit kom ook meestal sonder dat jy noodwendig iets omstrede gesê het.

Gister net nadat ek Reis sonder Grense aangekondig het, sms iemand: “Raak tog ontslae van Ian Wessels. Hy is eenvoudig modder!” Vroeër die week kry ek ‘n versoek van Oom André, ‘n Karooboer, om myself “tog net te gaan versuip.” Dit is dan seker nie so droog daar in sy kontrei nie? Die week het afgeskop met iemand wat beweer dat ek seker nog in my bed pis. Alle omroepers kry haatpos. Amore sê sy is in meer as 20 jaar nog net twee dae deur die liewe publiek gespaar, en dit was die twee dae na haar lewensmaat se dood. Martelize is al beskuldig dat sy net simpatie soek in haar rolstoel, en gister tydens die Top 20 wat Ettienne aangebied het, kom daar ‘n SMS deur wat hom ‘n “katools windbal” noem! Hy het darem twee kinders, so die windbal bewering kan met getuienis weerlê word…

Soos ek sê, hierdie mense reageer selde op iets spesifieks wat jy gesê het – eerder op iets wat hulle gedink het, of dalk soek hulle net ‘n bietjie aandag? Dit sal verskriklik interessant wees as iemand kan navorsing doen oor die klaers. Jy sien dieselfde naampies oor en oor, so daar moet vir seker ‘n gemene deler iewers wees. Ek is die enigste omroeper wat my haatpos graag op die lug lees, omdat dit vir my so snaaks is (ek is mos mal oor lag) en mense dit nooit wil glo as ek dit vir hulle privaat vertel nie. Ongelukkig dink baie van die normale luisteraars dan ek steur my aan die snert. Daarom is dit my Nuwejaarsvoorneme is om dit nie meer te doen nie. Hiedie mense is soos ‘n dronk ou op ‘n paartie. As jy aan hom aandag gee, raak hy net nog meer opdringerig, en die Bybel sê mos ‘n mens moet die dwaas nie na sy sotheid antwoord nie.

Dankie aan almal wat my probeer troos, maar wees gerus: My selfbeeld word darem nie bepaal deur die opinies van mense wie se genepoel ooglopend chloor kort nie! Ek glo wat ander mense van jou sê het niks met jou uit te waai nie. Terloops, die gewildste omroeper in die wêreld kry ook die meeste haatpos! Dit is ook so dat selfs die heel swakste omroeper ‘n klompie aanhangers het. Dis bloot soos dit is.

Baie dankie vir die talle komplimente. Ek lees hulle nooit op die lug nie omdat ek al jare ‘n spontane gly vang in omroepers wat graag boodskappies lees wat hulle vly. Dit klink vir my darem net te jakkals prys sy eie sterterig, maar ek lees hulle wel en waardeer elkeen. Hopelik kry ek weer iewers kans om in te staan, maar nou moet ek eers volstoom werk aan die boek oor humor in die regswêreld wat RSG gaan uitgee, en my nuwe reeks opgeneemde programme, “Wat’s jou uitspraak?” Ons sal binnekort weet wanneer dit uitgesaai gaan word en dan sal ek julle laat weet. Mooiloop intussen!